Институтот за комуникациски студии (ИКС) втора година по ред ја организира Неделата против лажните вести. Ќе информираме, едуцираме, дискутираме како да се бориме против лажните вести и дезинформациите преку обуки, вебинари, дискусии, онлајн квизови, анимирани видеа и други едукативни ресурси.Целта на Неделата против лажните вести е да се поттикне критичкото размислување и да им се понудат алатки на граѓаните со кои ќе можат полесно ќе ги препознаат и да се заштитат од лажните вести, манипулациите и дезинформациите.
Во рамките на Неделата против лажните вести ИКС ќе организира четири обуки, два вебинара и панел дискусија на тема „Младите и онлајн конзумеризмот“, а ќе се објават и нови сведоштва од серијалот „И новинарите грешат“.
Оваа година Неделата против лажните вести се приклучува кон Деновите на медиумска писменост кои ги организира Агенцијата за аудио и аудиовизуелни медиумски услуги.
Неделата против лажните вести е дел од проектот „Писменост за вести и дигитална писменост – Справување со лажните вести“ што го реализираат Македонскиот институт за медиуми, ИКС, Синдикатот на новинари и медиумски работници и Институтот за различности во медиумите од Лондон. Проектот е финансиран од Европската Унија.